К. Ташиев: «Генералдык сөзүмөн кайтпайм, 2027-жылы президенттикке барбайм»

Улуттук коопсуздук мамлекеттик комитетинин (УКМК) мурдагы төрагасы Камчыбек Ташиев коомчулукта кызуу талкууланып жаткан 2027-жылдагы президенттик шайлоого катышуу пландары тууралуу акыркы соңку чекитти койду. Бүгүн, 2026-жылдын 16-июлунда анын ишенимдүү өнөктөшү Өткүрбек Рахманов өзүнүн Фейсбуктагы расмий баракчасы аркылуу К. Ташиевдин коомдук-саясий чөйрөгө багытталган ачык билдирүүсүн жарыялады.

Камчыбек Ташиев өз кайрылуусунда акыркы убактарда анын ысымынын жана саясий кадамдарынын айланасында ар кандай ушак-айыңдар, божомолдоо жана такталбаган манипуляциялык маалыматтар кескин көбөйүп кеткенин белгилеген. Ал өзүнүн саясий багытын ачык көрсөтүү менен, келерки президенттик жарышка катышуудан биротоло баш тарта турганын билдирди. “Мен 2027-жылдагы президенттик шайлоого катышпайм. Бул тууралуу буга чейин да бир нече жолу так айткам. Бүгүн дагы ошол Генералдык сөзүмөн кайтпайм! Менин позициям өзгөргөн жок жана өзгөрбөйт!” — деп айтылат расмий билдирүүдө. Мындан сырткары, генерал-полковник 2027-жылдагы шайлоодо учурдагы мамлекет башчысы, Башкы кол башчы Садыр Нургожоевич Жапаровдун талапкерлигин толук колдой турганын жана бул чечим анын өлкөнүн туруктуулугун, мамлекеттик кызыкчылыкты жана элдин ынтымагын баарынан жогору койгон так позициясынын далили экенин кошумчалады.

Бул билдирүүгө карата белгилүү саясатчы, Жогорку Кеңештин экс-депутаты Исхак Масалиев өзүнүн эксперттик пикирин ортого салды. Масалиевдин айтымында, Ташиевдин соттуулугу анын президенттикке талапкер катары катышуу укугуна мыйзамдык жактан бөгөт коет. “Кааласа деле бара албайт да. Ал соттолгон да. Мажбур болуп жатат. Камчыбек Кыдыршаевич шайлоого катышпаса, Садыр Нургожоевичти колдосо, демек, шайлоого чейин акталат”, — деп билдирди саясатчы. Муну менен катар, талдоочулар бул кайрылууну эки саясий өнөктөштүн ортосундагы биримдикти көрсөтүү жана коомдогу мүмкүн болгон дестабилизациялык аракеттердин алдын алуу кадамы катары баалоодо.