Президент Садыр Жапаров курулуп жаткан «Бишкек Арена» стадионунун абалы менен таанышты

Бүгүн, 30-майда Кыргыз Республикасынын Президенти Садыр Жапаров Бишкек шаарында курулуп жаткан «Бишкек Арена» көп функционалдуу спорт комплексине пландан тышкары барып, жумуштун жүрүшүн жеринен көзөмөлдөдү.

Мамлекет башчысына берилген маалыматка ылайык, стадиондун курулушу бекитилген графикке ылайык туруктуу жүрүүдө. Учурда масштабдуу объектте курулуш-монтаждоо жана жасалгалоо иштери кызуу уланууда. Ошондой эле, инженердик тутумдарды орнотуу жана ички коммуникацияларды тартуу менен бирге, чектеш аймактарды тегерете көрктөндүрүү жумуштары катар жүргүзүлүп жатат.

Садыр Жапаров курулуш аянтчасын толугу менен кыдырып, болочок стадиондун ички бөлмөлөрүн, унаа токтотуучу жайдын жайгашуу тартибин жана пландалган коммерциялык объектилердин архитектуралык долбоорлорун кылдат көрүп чыкты. Мамлекет башчысы бул комплекстин Кыргызстандын спорттук инфраструктурасын өнүктүрүүдөгү жана өлкө аймагында эл аралык жогорку деңгээлдеги мелдештерди байма-бай өткөрүүдөгү стратегиялык маанисин өзгөчө баса белгиледи.

Президент комплекс пайдаланууга берилгенден кийин анын натыйжалуу жана өзүн-өзү актап иштеши үчүн зарыл болгон кошумча инфраструктураны түзүүнүн маанилүүлүгүнө токтолду. Буга байланыштуу стадиондун аймагына заманбап соода жана тейлөө объектилерин туура жайгаштыруу сунушталды. Мындай ийкемдүү кадам өз кезегинде комплексти күнүмдүк тейлөөгө жана келечекте аны финансылык жактан көз карандысыз өнүктүрүүгө туруктуу көмөк көрсөтөрү айтылды.