Дүйнө чемпионаты: Иран курамасы билет квотасынан ажыратылып, кысымга кабылды

Түндүк Америкада өтүп жаткан футбол боюнча Дүйнө чемпионатынын айланасында чоң саясий жаңжал тутанды. Ирандын улуттук курама командасы өз оюндарына көрүүчүлөр үчүн каралган кепилденген билет квотасынан толугу менен ажыратылды. Бул тууралуу Euronews эл аралык маалымат агенттиги билдирди.

Буга чейин Ирандын футбол федерациясына тайпалык этаптагы үч оюндун ар бирине стадиондордун сыйымдуулугунан 8 пайыздык билет квотасы кепилденген болчу. Бирок Тегеран расмий түрдө бул чектөө күтүүсүздөн жана эч кандай эскертүүсүз күчүнө киргенин жарыялады. Бул чечимдин артында ким турганы азырынча белгисиз бойдон калууда. Иран тарап Мундиаль уюштуруучуларын, тактап айтканда, Кошмо Штаттарынын тийиштүү органдарын айыптап, ФИФАга расмий нааразычылык протестин жолдоду. Жагдайды татаалдаштырган башкы маселе — Иран курамасы тайпалык этаптагы үч беттешин тең АКШ аймагында өткөрүүгө тийиш.

Визалык жана логистикалык чектөөлөргө жалгыз Иран гана эмес, башка өлкөлөрдүн да өкүлдөрү туш болууда. Дүйнө чемпионатынын ачылыш беттешине беш күн калганда Майами аэропортунда сомалилик калыс Омар Абдулкадир Артан артка кайтарылды. 34 жаштагы Артан өз өлкөсүнүн тарыхында Дүйнө чемпионатында калыстык кыла турган алгачкы рефери болмок. Ал ФИФА тарабынан тандалган 52 калыстын катарына кирген жана Африка континентинен барган жети өкүлдүн бири болчу, бирок АКШнын Бажы жана чек ара кызматы ага өлкөгө кирүүгө уруксат берген жок. Сомали тарап бул чечимди спорттун жана калыс оюндун (fair play) рухуна сокку деп атаганы менен, ФИФА бул кырдаал кайра каралбай турганын билдирди.

Мындан сырткары, Ирак курама командасынын чабуулчусу Аймен Хусейн Чикаго эл аралык аэропортунда 7 саат бою кармалып, текшерүүдөн кийин гана араң өткөрүлгөн. Ал эми Сенегал курама командасынын футболчуларынын дээрлик бардыгы катуу тинтүүгө алынып, анын видеосу социалдык тармактарга тарап кетти. Жадакалса, Нью-Йоркто Нидерланды менен жолдоштук беттеш өткөрүү үчүн келген Өзбекстандын бүтүндөй курама командасы, анын ичинде башкы машыктыруучусу, дүйнө чемпиону Фабио Каннаваро да федералдык агенттер жана атайын үйрөтүлгөн иттер менен кошо катуу текшерүүдөн өткөрүлгөнү нааразычылыктарды жаратууда.