Кыргызстанда Бишкек менен Ош шаарларынын ортосунда темир жол линиясын куруу жана кийинчерээк ылдам жүрүүчү жүргүнчү ташуучу поездди ишке киргизүү мүмкүнчүлүктөрү изилденип жатат. Бул тууралуу “Кыргыз темир жолу” улуттук компаниясы” мамлекеттик ишканасынын башкы директору Азамат Сакиев “Биринчи радио” радиосунун эфиринде билдирди.

Анын айтымында, өлкөнүн түндүгү менен түштүгүн темир жол аркылуу бириктирүү башкы артыкчылыктуу багыттардын бири болуп саналат. Алдын ала болжолдоолор боюнча, Бишкек менен Оштун ортосундагы жол убактысы болжол менен 6–8 саатты түзүшү мүмкүн. Ал эми так убактысы долбоордун техникалык-экономикалык негиздемеси (ТЭН) даярдалгандан кийин белгилүү болот.

Унаа жолдоруна түшкөн жүктү азайтуу

Сакиев жаңы темир жол линиясы жүргүнчүлөрдү ташуу үчүн гана эмес, Бишкек — Ош унаа жолундагы жана альтернативдүү Түндүк — Түштүк автожолундагы жүктү жеңилдетүүгө да шарт түзөрүн баса белгиледи. Анткени мунай өнүмдөрүн жана башка оор жүктөрдү темир жол аркылуу ташууга мүмкүнчүлүк түзүлөт.

Ал ошондой эле темир жол тармагын өнүктүрүү Кыргызстандын экономикасы жана логистикасы үчүн өзгөчө мааниге ээ экенин, ошондой эле автомобилдик жолдордогу жүктөмдү азайтып, ташуулардын коопсуздугун жогорулатууга өбөлгө түзөрүн кошумчалады.

Тармакты өнүктүрүүнүн этаптары

Тармакты өнүктүрүүнүн маанилүү этаптарынын бири катары Сакиев 2026-жылдын июль айынын аягында ачылган, узундугу 63 чакырымды түзгөн Балыкчы — Кочкор темир жол тармагын атады.

Учурда ишкана бул линияны Кара-Кечеге чейин, андан соң Макмалга чейин улантуу боюнча техникалык-экономикалык негиздемени даярдоого киришип жатат.