“Кытай-Кыргызстан-Өзбекстан” темир жолунун курулушу талкууланды

Кыргыз Республикасынын Министрлер Кабинетинин Төрагасынын орун басары — Суу ресурстары, айыл чарба жана кайра иштетүү өнөр жайы министри Эрлист Акунбеков Жалал-Абад облусуна болгон жумуш сапарынын алкагында чөлкөмдүк маанидеги эң ири масштабдуу долбоор — “Кытай-Кыргызстан-Өзбекстан” эл аралык темир жолун куруу маселелерине байланышкан көчмө жыйын өткөрдү.

Президенттин Жалал-Абад облусундагы ыйгарым укуктуу өкүлчүлүгүндө өткөн бул оттурумда негизги басым социалдык-укуктук маселелерге жасалды. Тактап айтканда, темир жол магистралы өтө турган аймактардагы жергиликтүү жарандарга, турак жай ээлерине бериле турган кенемтелерди (компенсация) өз убагында төлөө жана жер участокторун бөлүү маселелери терең талкууланып, жыйынтыгында конкреттүү протоколдук тапшырмалар берилди. Маанилүү жыйынга борбордук мамлекеттик органдардын жетекчилери, жергиликтүү бийлик башчылары жана “Кытай-Кыргызстан-Өзбекстан темир жолу” биргелешкен компаниясынын ыйгарым укуктуу өкүлдөрү катышты.

Геоэкономикалык эсептөөлөргө таянсак, Кыргызстандын аймагы аркылуу өтүүчү “Кытай-Кыргызстан-Өзбекстан“ темир жолунун жалпы узундугу 304 чакырымдан ашык аралыкты түзөт. Долбоордун жалпы инвестициялык баасы 4 миллиард 700 миллион долларды түзүп, бул өлкө тарыхындагы эң кымбат жана масштабдуу капиталдык салым болуп калмакчы. Техникалык-инженердик көз караштан алганда, бул жол өтө татаал тоолуу рельефте жайгашкандыктан, анын алкагында жалпы узундугу болжолдуу 120 чакырымга созулган 50 заманбап көпүрө жана 29 жогорку технологиялык туннель курулат. Бул көрсөткүч жалпы темир жолдун туура 40 пайызы туннелдерден жана көпүрөлөрдөн турарын айгинелейт.

Эске сала кетсек, бул тарыхый транспорттук долбоордун иш жүзүндө башталышына 2024-жылдын 27-декабрында расмий старт берилген. Анда Кыргызстандын Президенти Садыр Жапаров, Кытай Эл Республикасынын Төрагасы Си Цзинпин жана Өзбекстан Республикасынын Президенти Шавкат Мирзиёев атайын расмий кайрылуу жасашып, аталган темир жолдун Евразия чөлкөмүндөгү соода-логистикалык чынжырчаларды түп-тамырынан бери өзгөртө турган стратегиялык ролуна токтолушкан. Учурда объекттерде курулуштун алгачкы этаптары активдүү фазада жүрүүдө.