Meta Platforms Inc. компаниясы премьер-министр Нарендра Модинин Facebook баракчасындагы билдирүүсүнө убактылуу чектөө киргизгени үчүн Индия бийлигинен кечирим сурады. Бул тууралуу Bloomberg кабарлады.

Маалыматка караганда, шаршемби күнү Нью-Делиде Meta компаниясынын Глобалдык маселелер боюнча директору Джоэл Каплан баштаган жетекчилер тобу Индиянын Электроника жана маалымат технологиялары министри Ашвини Вайшнав менен жолугушкан.

Кеп Модинин Facebook жана Instagram тармактарына жайгаштырган видеокайрылуусунун өчүрүлүшү тууралуу болуп жатат. Видеодо Индия өкмөт башчысы студенттик нааразычылыктар фонунда документтердин ачыкка чыгып кетишине каршы катаал чаралар көрүлөрүн убада кылган. Meta бул видеону кыска убакытка бөгөттөп, коомчулуктун нааразычылыгынан кийин «контент катачылыктан улам өчүрүлгөн» деген түшүндүрмө менен кайра калыбына келтирген.

Парламенттин ультиматуму жана юридикалык коркунучтар

Индия — колдонуучулардын саны боюнча Meta үчүн эң чоң рынок болуп саналат. Bloomberg белгилегендей, өлкөдө WhatsApp тиркемесин 600 миллиондон ашык киши колдонот.

Буга чейин Индия парламентинин Байланыш жана маалымат технологиялары боюнча комитети Meta компаниясынын башкы директору Марк Цукербергге үч күндүк ультиматум койгон. Анда Модинин билдирүүсүн убактылуу өчүргөнү үчүн кечирим суроо талап кылынган.

Эске салсак, февраль айында Нарендра Моди Instagram тармагында катталуучуларынын саны 100 миллиондон ашкан дүйнөдөгү биринчи саясатчы болгон.