CNN телеканалынын негиздөөчүсү Тед Тернер каза болду

Глобалдык телекөрсөтүүнүн өнүгүүсүнө таасирин тийгизген медиамагнат Тед Тернер 88 жаш курагында дүйнөдөн кайтты. 1980-жылы ал дүйнөдөгү биринчи күнү-түнү иштеген жаңылыктар каналы — CNN’ди негиздеген. Ошондой эле Тернер филантроп катары да кеңири белгилүү болчу.

CNN телеканалынын негиздөөчүсү Тед Тернер 88 жаш курагында көз жумганын CNN Turner Enterprises компаниясынын пресс-релизине таянып кабарлады.

2018-жылы Тернерге мээнин өнүгүп жаткан оорусу — Леви денечелери бар деменция диагнозу коюлганын билдирген. 2025-жылдын башында медиамагнат пневмониянын жеңил формасы менен ооруканага жаткырылып, реабилитациялык борбордо дарылангандан кийин айыгып чыккан.

Тернердин артында беш баласы, 14 небереси жана эки чөбөрөсү калды.

CNN Worldwide тармагынын төрагасы жана башкы директору Марк Томпсон Тернерди өз ишине берилген, өтө активдүү жана коркпогон лидер, ар дайым өзүнүн чечимине таянган инсан деп атады.

«Ал CNN’дин руханий тиреги болгон жана боло берет. Тед — биз жөлөнүп турган алп адам, бүгүн биз анын жаркын элесин эскерип, анын биздин жашообузга жана дүйнөгө тийгизген таасирин баалайбыз», — деп айтылат Томпсондун билдирүүсүндө.

Кайрымдуулук жана башка долбоорлор

Бизнестин тышкары, Тернер ири масштабдуу кайрымдуулук иштери менен да таанымал болгон. Ал негиздеген фонд жүз миллиондогон долларды экологиялык долбоорлорго, туруктуу энергетиканы өнүктүрүүгө жана биологиялык ар түрдүүлүктү сактоого жумшаган. 1997-жылы Тернер Бириккен Улуттар Уюмуна 1 миллиард долларга чейин каражат которо турганын жарыялап, БУУнун Фондун түзгөн.

Медиамагнат АКШда ири жер тилкелерине, анын ичинде Түндүк Америкадагы бизондордун эң ири коммерциялык үйүрү (45 миң баш) бар 13 ранчону ээлик кылган. Тернер кайра жаралуучу энергияга инвестиция салып, Ted’s Montana Grill ресторандар тармагын жана Ted Turner Reserves туристтик программасын өнүктүргөн.

Тед Тернер медиага жана коомдук иштерге кошкон салымы үчүн көптөгөн сыйлыктарга, анын ичинде 1991-жылы Time журналынын версиясы боюнча «Жылдын адамы» наамына татыган.