Президент Садыр Жапаров бүгүн, 27-майда кыргызстандыктарды ыйык Курман айт майрамы менен куттуктап, өлкөдөгү тынчтык, ынтымак жана коомдук биримдик мамлекеттин эң башкы баалуулугу экенин өзгөчө белгиледи.

Мамлекет башчысы өз кайрылуусунда Курман айт майрамы боорукердикти, кайрымдуулукту жана адамдардын бири-бирине болгон терең сый-урматын бекемдей турган өзгөчө руханий күн экенине токтолду. Бул майрам коомду асыл сапаттарга үндөп, ынтымакты арттырууга кызмат кыларын айтты.

Президент өлкөдөгү ар бир үй-бүлөгө кут-береке, бейпилдик жана токчулук каалап, тагдырдын буйругу менен чет өлкөлөрдө эмгектенип, билим алып жүргөн мекендештерге дагы өзүнүн жылуу тилектерин жолдоду. Муну менен бирге, учурда Мекке шаарында ыйык ажылык сапарын аткарып жаткан кыргызстандык зыяратчылардын ажылыгы жана дубалары кабыл болушун тиледи.

Ыйык майрамдын урматына өлкө аймагында коомдук тартипти жана коопсуздукту камсыз кылуу чаралары күчөтүлүп, майрамдык иш-чаралар жогорку уюшкандык деңгээлде өткөрүлүүдө.