Кыргызстандын Башкы прокуратурасы УКМКнын мурдагы төрагасы Камчыбек Ташиевге жана “75тин каты” катары белгилүү кылмыш иши боюнча айыпталган калган жети кишиге карата чыккан сот өкүмүнө карата апелляциялык сунуштама кылды. Бул тууралуу көзөмөл органынан кабарлашты.

Мамлекеттик айыптоочулар КР Жазык-процессуалдык кодексинин 397-беренесинин негизинде жогорку соттук инстанцияга кайрылышкан. Бирок Башкы прокуратура өкүмдүн дал кайсы бөлүгүнө макул эместигин жана кайсы чечимди талап кылып жатканын ачыктаган жок.

Резонанстуу кайрылуу жана камакка алуулар

Эске салсак, 2026-жылдын 9-февралында 75 саясатчы, мурдагы аткаминерлер, коомдук ишмерлер, маданият жана саламаттыкты сактоо тармагынын өкүлдөрү Президент Садыр Жапаровго мөөнөтүнөн мурда президенттик шайлоо өткөрүү сунушу менен кайрылышкан. Кат ошондой эле Жогорку Кеңештин ошол кездеги төрагасы Нурланбек Тургунбек уулуна да даректелген.

Бул кайрылуу коомчулукта ачыкка чыккандан кийин ага кол койгондор суракка чакырылган. Алардын ичинен бешөө — Бекболот Талгарбеков, Эмиль Узакбаев, Курманбек Дыйканбаев, Курсан Асанов жана Аалы Карашев — тергөө изоляторуна (СИЗО) камалган. Башында иш “Массалык башаламандыктар” беренеси боюнча изилденип жаткан.

Соттун чечими жана жактоочулардын позициясы

Бул иш боюнча К. Ташиевден сырткары Курманкул Зулушев, Нурланбек Тургунбек уулу, Бекболот Талгарбеков, Курсан Асанов, Курманбек Дыйканбаев, Аалы Карашев жана Эмиль Узакбаев айыпталуучу катары өтүшкөн.

2026-жылдын 2-июлунда Бишкектин Биринчи май райондук соту сегиз фигурантты тең бийликти күч менен басып алууга даярдангандыгы үчүн күнөөлүү деп тапкан. Сот алардын мүлкүн конфискациялоо менен төрт жылдан эркиндигинен ажыратуу өкүмүн чыгарып, бирок пробациялык көзөмөл колдонгон. Февраль айынан бери камакта жаткан беш айыпталуучу сот залынан бошотулган. Ошол эле учурда Ташиев жана айрым фигуранттар кызмат абалынан кыянаттык менен пайдалануу айыбы боюнча акталган.