Орусия Кыргызстанга ай сайын 100 миң тоннадан күйүүчү-майлоочу май (КММ) жөнөтүп турат. Макулдашууларга жетишилгени тууралуу Министрлер кабинетинин төрагасынын биринчи орун басары Данияр Амангелдиев билдирди.

Анын айтымында, келишимге 30-июль күнү кол коюлган. Учурда тараптар күйүүчү майдын баасы боюнча сүйлөшүүлөрдү улантууда.

Амангелдиев бензин жана дизель майын үзгүлтүксүз камсыз кылуу максатында Кыргызстан башка өлкөлөр менен да сүйлөшүүлөрдү жүргүзүп жатканын кошумчалады. Буга чейин Орусия өкмөтү бензин, дизель жана майдын башка түрлөрүн экспорттоого 2027-жылдын 31-январына чейин убактылуу тыюу салган. Бирок 1-сентябрдан тарта бул чектөөлөр өндүрүүчүлөр тарабынан экспорттолгон дизель, кеме отуну жана газойлго жайылтылбайт. Ошондой эле өкмөттөр аралык макулдашуулар жана гуманитардык жардам алкагында ташууга уруксат берилген.

Июль айында Кыргызстандын Нефтетрейдерлер ассоциациясынын башчысы Канатбек Эшатов Орусиянын мунай кайра иштетүүчү заводдорунан сунуштун азайышына байланыштуу өлкөдө АИ-95 жана АИ-98 үлгүсүндөгү бензиндин тартыштыгы байкалып жатканын билдирген.

Ошондой эле июль айынан тарта Кыргызстанга Беларусь жана Кытайдан да КММ импорттоло баштады.

Кыргызстандагы күйүүчү майдын актуалдуу баалары

Ички базарда АИ-95 бензини мамлекеттик бааны жөнгө салуу тизмесинен чыгарылып, эркин рыноктук баага өткөндүгүнө байланыштуу соңку жумаларда КММ бааларында өсүш байкалууда.