Бүгүн, 26-майда “Манас” эл аралык аэропортунун аймагында ата мекендик авиациялык инфраструктураны түп-тамырынан бери жаңылай турган маанилүү окуя болду. “Кыргызстан аэропорттору” ААКтын туунду түзүмү болуп саналган “Асман Ойл Компани” ЖЧКсынын жаңы заманбап күйүүчү май куюу комплексинин салтанаттуу ачылыш аземи өттү.

Бул ири стратегиялык объекттин курулуш иштери 2022-жылдын май айында башталган. Долбоордун башкы өзгөчөлүгү — ал толугу менен сырттан насыя же кошумча инвестор тартпастан, компаниянын өз каражаттарынын эсебинен каржыланып, ийгиликтүү бүткөрүлгөнү болду. Бүгүнкү күндө өндүрүштүк комплекс техникалык сыноолордон өтүп, толук кубаттуулукта иштеп жатат.

“Манас” эл аралык аэропортунун аймагындагы жаңы күйүүчү май куюу комплекси өлкөнүн авиациялык коопсуздугун камсыздоодо негизги тирекке айланмакчы.

Жаңы ишке кирген авиациялык күйүүчү май сактагычтардын жалпы сыйымдуулугу 8 миң куб метрди түзөт. Бул көлөм Кыргызстандын аймагындагы бардык аэропортторго конуп-учуп жаткан аба кемелеринин авиакеросинге болгон ички муктаждыктарын үзгүлтүксүз жана толук көлөмдө камсыз кылууга мүмкүнчүлүк берет.

Фискалдык жана каржылык талдоолор көрсөткөндөй, “Асман Ойл Компани” ЖЧКсы өлкөдөгү авиациялык май жеткирүү багытында алдыңкы позицияны ишенимдүү кармап келет. Маселен, 2022-жылдан 2025-жылга чейинки аралыкта ишкананын таза кирешеси эки эседен ашык өсүп, 518 миллион сомдон 1 миллиард 205 миллион сомго жеткен. Мындай секирик компаниянын туруктуу өнүгүү жолунда экенин жана жалпы Кыргызстандын авиация тармагы системалуу түрдө алдыга жылып жатканын айгинелейт.

Адистердин пикиринде, мындай масштабдуу долбоорлордун ишке ашышы өлкөнүн транспорттук-логистикалык көз карандысыздыгын бекемдеп, ички авиакаттамдардын жана эл аралык аба каттамдарынын коопсуз, үзгүлтүксүз иштешин жаңы деңгээлге көтөрөт.