18-июлга караган түнү Москов жана Тамбов облустарындагы Wildberries логистикалык комплекстерине дрондордун чабуулунун натыйжасында кыргызстандык ишкерлер зыян тартышты. Бул тууралуу республиканын Экономика жана коммерция министрлиги ведомствонун башчысы Бакыт Сыдыковдун Wildberries’тин Кыргызстандагы өкүлү менен жолугушуусунун жыйынтыгында билдирди.

Министрликтен кабарлашкандай, тигүү тармагынын ишкерлеринин товарлары компаниянын Электросталь жана Котовск шаарларындагы кампаларында болгон. Wildberries министрликти маалымдагандай, учурда зыянды баалоо, анын ичинде складдык инфраструктуранын бузулуу көлөмүн аныктоо жана кампаларда турган товарларга инвентаризация жүргүзүлүүдө.

Зыянды баалоо аяктап, алынган маалыматтар талдангандан кийин министрлик инциденттин кесепеттерин жоюу боюнча биргелешкен чечимдерди иштеп чыгуу үчүн компаниянын өкүлдөрү менен дагы бир жолу жолугууну пландаштырууда.

Форс-мажор шарттары жана юридикалык абал

Маркетплейстин офертасына ылайык, эгерде милдеттерди аткарбоо «жеңгис күч» (форс-мажор) жагдайларынан улам келип чыкса, анын ичинде дрондордун чабуулдарынын кесепеттери кирсе, Wildberries милдеттерин аткарбагандыгы үчүн жоопкерчиликтен бошотулат.

Чабуулдардын кесепеттери

18-июлдан 22-июлга чейин Wildberries’тин төрт логистикалык объектиси чабуулга кабылды: Котовск жана Электросталь шаарларындагы бөлүштүрүү борборлору, ошондой эле Краснодар жана Невинномысск кампалары.

Чабуулдардан кийин Wildberries логистикалык чынжырларды кайра курганын жана платформанын иши штаттык режимде уланып жатканын билдирди.